👉 2013ની બેચના IAS અધિકારીને મહેસાણા જિલ્લાની વહીવટી કમાન સોંપાઈ; અગાઉ ગાંધીનગરના ગૃહ વિભાગમાં અધિક સચિવ તરીકે ફરજ બજાવતા હતા
મહેસાણા જિલ્લાના નવા જિલ્લા કલેક્ટર અને જિલ્લા મેજિસ્ટ્રેટ તરીકે ભારતીય વહીવટી સેવા (IAS)ના અધિકારી ડૉ. હર્ષિત પી. ગોસાવીએ સોમવારે વિધિવત રીતે કાર્યભાર સંભાળી લીધો છે. ગુજરાત સરકારના સામાન્ય વહીવટ વિભાગ દ્વારા IAS અધિકારીઓની કરવામાં આવેલી બદલીના ભાગરૂપે ડૉ. ગોસાવીની મહેસાણા જિલ્લા કલેક્ટર તરીકે નિમણૂક કરવામાં આવી છે. તેમણે તા. 26 ઓક્ટોબર, 2026ના રોજ જિલ્લા સેવા સદન ખાતે કચેરી સમય પૂર્વે હોદ્દો ગ્રહણ કરી વહીવટી કામગીરીનો પ્રારંભ કર્યો હતો.
વર્ષ 2013ની બેચના IAS અધિકારી ડૉ. હર્ષિત પ્રુથ્વીરાજ ગોસાવી આ અગાઉ ગાંધીનગર ખાતે ગુજરાત સરકારના ગૃહ વિભાગમાં અધિક સચિવ (કાયદો અને વ્યવસ્થા) તરીકે મહત્વની જવાબદારી નિભાવી રહ્યા હતા. રાજ્યના ગૃહ વિભાગમાં ફરજ બજાવ્યા બાદ હવે તેમને મહેસાણા જિલ્લાના વહીવટી વડા તરીકેની જવાબદારી સોંપવામાં આવી છે.
ડૉ. ગોસાવીએ મહેસાણાના પૂર્વ જિલ્લા કલેક્ટર એસ. કે. પ્રજાપતિનું સ્થાન લીધું છે. રાજ્ય સરકારના બદલીના આદેશ બાદ મહેસાણા ખાતે નિયુક્ત થયેલા ડૉ. ગોસાવીએ સત્તાવાર રીતે કાર્યભાર સંભાળતાં જિલ્લા વહીવટી તંત્રનું સુકાન પોતાના હાથમાં લીધું છે.
જિલ્લા કલેક્ટર તરીકે તેમની મુખ્ય જવાબદારીઓમાં જિલ્લા વહીવટનું સંચાલન, સરકારી યોજનાઓનો અસરકારક અમલ, મહેસૂલ સંબંધિત કામગીરી, કાયદો અને વ્યવસ્થાના પ્રશ્નોમાં સંકલન તેમજ નાગરિકલક્ષી સેવાઓનો સમાવેશ થાય છે. હવે નવા જિલ્લા કલેક્ટરના માર્ગદર્શન હેઠળ મહેસાણા જિલ્લાના વહીવટી તંત્રની કામગીરી આગળ વધશે.
મહેસાણા જિલ્લા વહીવટમાં નવા અધ્યાયનો પ્રારંભ
ડૉ. હર્ષિત પી. ગોસાવીના કાર્યભાર સંભાળવાની સાથે મહેસાણા જિલ્લાના વહીવટી તંત્રને નવા વડા મળ્યા છે. આગામી સમયમાં જિલ્લાના વિવિધ વહીવટી પ્રશ્નો, વિકાસલક્ષી કામગીરી અને સરકારી સેવાઓના અમલીકરણમાં જિલ્લા કલેક્ટર તરીકે તેમની ભૂમિકા મહત્વપૂર્ણ રહેશે.
જૈમિન સથવારા – કડી
