મહેસાણા લોકલ ક્રાઇમ બ્રાન્ચે જીલ્લા સહિત અમદાવાદ અને ગાંધીનગરમાં સક્રિય એક્ટિવા ચોર ગેંગના એક સાગરીતને ઝડપી પાડી કુલ 15 એક્ટિવા રિકવર કર્યા છે. પોલીસ દ્વારા અંદાજે 3,83,000 ની કિંમતનો મુદ્દામાલ જપ્ત કરી કાયદેસરની કાર્યવાહી હાથ ધરવામાં આવી છે.
ગાંધીનગર રેન્જ આઈ.જી. વિરેન્દ્રસિંહ યાદવ અને મહેસાણા પોલીસ અધિક્ષક હિમાંશુ સોલંકીની સૂચનાથી મિલકત વિરૂધ્ધના ગુના શોધવા માટે LCB પી.આઈ. એ.એમ. કામળીયાના માર્ગદર્શન હેઠળ ટીમો બનાવવામાં આવી હતી. પેટ્રોલિંગ દરમિયાન HC રશ્મેન્દ્રસિંહ અને HC પ્રદિપકુમારને બાતમી મળી હતી કે એક ઇસમ નંબર પ્લેટ વગરના સફેદ એક્ટિવા સાથે કોઠાસણાથી સતલાસણા તરફ જઈ રહ્યો છે.
પોલીસે વોચ ગોઠવીને મહેશ બાબુભાઇ દરજી (ઉં.વ. 40, રહે. ઉમરી, સતલાસણા) ને અટકાવ્યો હતો. તેની પાસે રહેલા એક્ટિવા બાબતે પૂછપરછ કરતા તેણે આ વાહન વિસનગરની સ્વસ્તિક મેડિકલ સામેથી ડુપ્લીકેટ ચાવી વડે ચોર્યું હોવાની કબૂલાત કરી હતી.
આરોપીની કડક પૂછપરછમાં ચોંકાવનારા ખુલાસા થયા છે. આરોપી જાહેર પાર્કિંગમાં પડેલા એક્ટિવાને નિશાન બનાવતો અને ડુપ્લીકેટ ચાવી વડે લોક ખોલી વાહનની ચોરી કરતો હતો. તેણે અત્યાર સુધીમાં નીચે મુજબના સ્થળોએથી વાહનોની ચોરી કરી હોવાનું કબૂલ્યું છે:
અમદાવાદ શહેરમાં ગાંધીનગરમાં, મહેસાણા જિલ્લામાંથી આ એક્ટિવાની ચોરી કરેલ છે
મહેસાણા LCB એ આરોપી પાસેથી કુલ 15 એક્ટિવા જપ્ત કરી તેને ભારતીય નાગરિક સુરક્ષા સંહિતાની કલમ હેઠળ અટક કરી આગળની તપાસ માટે સતલાસણા પોલીસને સોંપ્યો છે. આ કામગીરીમાં LCBના PSI એ.ડી. કાકરેચા, ASI પિયુષકુમાર, બીપીનકુમાર તથા અન્ય સ્ટાફ જોડાયો હતો.
